الريس عطلنى عن فرحى لمدة ساعة

الساعة دلوقتى خمسة ...فاضل على فرحى 3 ساعات ...يااااااه اخيرا حاكون عريس ... بعد 32 سنة...انا فى حلم ولا حقيقة ... متستغربوش من 32 دى لان ده خلاص بقى شئ طبيعى ان الواحد عقبال لما يكون نفسه ممكن يوصل لبعد كده..... كنت فاتح مكتب محاماة  صغير ..كنت واخده ايجار قديم وكنت على امل انى اكبر بسرعة واعيش الحياة اللى كنت بحلم بيها ...شقة واسعة وفى منطقة شيك....وعربية مش شرط تكون احسن موديل ...ودخلى على الاقل يكفى بيتى ...ومش شرط اصيف فى مارينا مالها مرسى مطروح....

عشت ع الامل ده من وانا عندى 25 سنة ..اخرت فكرة الجواز وقلت انا مش حتنازل عن حلمى ...وسنة ورا سنة لقيت الحلم بيبعد وبيتكسر حتة حتة على صخرة الواقع اللى احنا عيشينه ...الحديد بيزيد سعره كل يوم وطبعا الشقق عمالة تغلى ...كنت بقعد مع نفسى واحاول اقنعها ان بكرة اكيد حيبقى احسن ...

لكن مفيش فايدة ...مكنتش ملاحق ع المصاريف .... مساعدتى لوالدتى واخواتى ولا احوش علشان اكون نفسى ولا اغطى مصاريفى الشخصية.......اااااااااه تعبت مش قادر اكمل ....ولقيت العمر بيجرى بيا لغاية لما بصيت فى المراية فى يوم ولقيت عندى 32 سنة ...ياااااااه بسرعة كده العمر جرى بيا ...ساعتها قعدت مع نفسى وقررت انى لازم اخد خطوة جدية بس الخطوة دى حتخلينى اتخلى عن حلمى ....قلت مش مشكلة ابدأ صغير وبكرة ان شاء الله الوضع يبقى احسن..

.وقررت ان مكتبى الصغير ده حيبقى بيت الزوجية اهو منه سكن ومنه مكتب ..اودتين وصالة مش وحشين ..الحمد لله على كل شئ...وبعديها رحت اتقدمت لناس طيبين علشان اطلب بنتهم للجواز ...والحمد لله ربنا رزقنى ببنت الحلال والاهل الكويسين....وحددنا ميعاد كتب الكتاب يوم الجمعة 15/8 ....وجا يوم الجمعة واخيرا بقيت عريس لبست البدلة وبصيت فى المراية وحمدت ربنا ...وخرجت من بيتى واهلى حواليا فرحانين بيا وامى تبكى من فرحتها ..وركبت العربية...كانت الساعة 7:30 وتوجهت للمسجد اللى عاملين فيه كتب الكتاب ...لكن فجأة لقيت جنود امن مركزى فى كل حتة والطريق مقفول مكنتش عارف ايه السبب ولما سألنا قالولنا موكب الريس مبارك حيمر من هنا...فضلنا مستنين شوية لكن الموضوع طول اوى....ساعتها مبقتش عارف اعمل ايه ؟ المعازيم بيتصلوا بيا بيستعجلونى وانا مش عارف اعمل ايه....

ساعتها صعبت عليا نفسى اوى وحسيت انى مش مكتوب لى افرح ...وقولت هو الريس مبارك حيفضل ورايا فى كل حتة ..حتى فى يوم فرحى مش سايبنى ...وبعد ساعة تقريبا الطريق فتح ..وصلت المسجد لكن للاسف كنت اخر واحد يوصل الفرح ..بس الحمد لله اليوم عدى على خير وكتبت كتابى ...لكن كنت عاوز اوصل فى الاخر حاجة للحكومة والريس مبارك ..انا مطلبتش منكم وظيفة ...ولا طلبت منكم شقة ..ولا طلبت منكم اى مساعدة...انا كل اللى  بطلبه انكم تسيبونا نعيش.. سيبونا نعيش ساعة الفرحة ..ارحمونا يرحمكم ربنا